Eisíonn an tAire Donnelly nuashonruithe ar fhreagairt shláinte phoiblí na hÉireann ar phaindéim COVID-19

Tar éis dó comhairle a fháil ón bPríomhoifigeach Leighis, d’fhógair an tAire Sláinte, Stephen Donnelly TD nuashonruithe ar fhreagairt shláinte phoiblí na hÉireann ar phaindéim COVID-19.

Baineann na nuashonruithe seo le tástáil phobail ar dhaoine siomptómacha agus le haonrú cásanna a bhfuil ionfhabhtú deimhnithe COVID-19 orthu.

Tástáil phobail orthu siúd a bhfuil siomptóim COVID-19 orthu

Is í an chomhairle atá ann faoi láthair gur chóir dóibh siúd go léir a bhfuil siomptóim COVID-19 orthu féin-aonrú agus tástáil PCR a fháil.

I bhfianaise an líon mór galar atá anois ann agus, chun an úsáid is fearr a bhaint as an gcumas tástála atá ar fáil chun sainaithint tapa ionfhabhtaithe COVID-19 a chinntiú, agus chun tacú le cloí leis an gcomhairle sláinte poiblí:

Ba chóir do dhaoine aonair siomptómacha idir 4-39 bliana d’aois aonrú láithreach agus tabhairt faoi thástálacha rialta antaiginí seachas tástáil PCR a chur in áirithe. Ba cheart d’aon duine a bhfuil tástáil antaigin acu a bhraitheann COVID-19 tástáil PCR daingniúcháin a lorg. Ba cheart dóibh siúd a bhfuil tástálacha antaiginí ‘neamhbhraite’ leanúnacha acu leanúint ag féin-aonrú go dtí 48 uair an chloig tar éis dá gcuid siomptóim imeacht.
Ba cheart d’oibrithe cúram sláinte siomptómacha leanúint ar aghaidh ag lorg tástála PCR.
De réir na comhairle reatha, ba cheart d’aon duine a bhfuil bunfhadhb sláinte acu a chuireann i mbaol níos airde galar trom iad nó aon duine a bhfuil imní cliniciúil orthu teagmháil a dhéanamh lena dhochtúir teaghlaigh.
Ba chóir do gach duine siomptómach eile (iad siúd 0-3 bliana d’aois agus iad siúd atá níos sine ná 40 bliain) tástáil PCR a lorg a luaithe a thaispeánann siad siomptóim COVID-19.

Tréimhse aonrúcháin dóibh siúd a ndearnadh diagnóis COVID-19 orthu

Tugann treoir reatha maidir le féin-aonrú le fios gur chóir do dhaoine fásta a fhaigheann toradh deimhneach COVID-19 ó thástáil PCR féin-aonrú ar feadh 10 lá ó thosach na siomptóim (nó dáta na tástála PCR más duine neamhshiomptómach é).

Tá an chomhairle seo athraithe anois chun deis a thabhairt dóibh siúd a bhfuil teanndáileog faighte acu, trí thrí dháileog vacsaín a fháil nó trí theaglaim de phríomh-vacsaín agus ionfhabhtú le déanaí, agus dóibh siúd nach bhfuil, mar a leanas:

Ba chóir dóibh siúd atá 13 bliana d’aois agus níos sine atá seacht lá ar a laghad tar éis na teanndáileoige nó iad siúd a chríochnaigh a bpríomhchúrsa vacsaínithe agus a raibh ionfhabhtú COVID-19 orthu laistigh de na trí mhí roimhe sin, iad féin a aonrú ar feadh seacht lá ar a laghad ó thosach na siomptóm (nó dáta na chéad tástála dearfaí má tá siad neamhshiomptómach) agus scoir den aonrú tar éis seacht lá má tá na siomptóim réitithe go mór nó go hiomlán don dá lá deiridh den seacht lá sin agus sin amháin. Ba chóir dóibh siúd atá ag scor den aonrú tar éis seacht lá (ó laethanta 8 go 10 tar éis thús na siomptóm):
Dlúth-theagmháil le daoine eile lasmuigh dá dteaghlach a theorannú, go háirithe i spásanna plódaithe, dúnta nó aeráilte go dona
Masc aghaidh a chaitheamh i spásanna plódaithe, dúnta nó aeráilte go dona agus áit a bhfuil siad i ndlúth-theagmháil le daoine eile
Tástáil antaiginí a dhéanamh sula dtéann siad isteach i spásanna plódaithe, dúnta nó aeráilte go dona agus sula mbíonn dlúth-theagmháil acu le daoine eile ón taobh amuigh dá dteaghlach
Teagmháil le duine ar bith atá i mbaol níos airde breoiteachta a sheachaint má tá COVID-19 orthu
Oibrigh ón mbaile mura bhfuil sé riachtanach freastal go pearsanta
Cloí le gach beart cosanta sláinte poiblí eile.
Ba chóir do gach duine eile atá 13 bliana d’aois agus níos sine a fhaigheann toradh deimhneach ó thástáil PCR leanúint ar aghaidh ag féin-aonrú ar feadh 10 lá ó thús na siomptóm agus scoir den aonrú tar éis deich lá tá na siomptóim réitithe go mór nó go hiomlán don dá lá deiridh den deich lá sin agus sin amháin.
Leanfaidh na riachtanais aonrúcháin reatha do leanaí óga (iad siúd 0-12 bliana d’aois) a ndearnadh diagnóis COVID-19 orthu i bhfeidhm.

Dúirt an tAire Donnelly:

“Soláthrófar tástáil antaiginí dóibh siúd idir 4-39 bliana d’aois, nach bhfuil bunfhadhb sláinte acu ag baint úsáide as an tsamhail atá i bhfeidhm faoi láthair laistigh de FSS - seachadadh baile ó phointe dáilte lárnach. Chuir FSS in iúl gur féidir socruithe chun soláthar a dhéanamh do dháileadh tástálacha antaiginí a oibriú ón Luan seo chugainn an 3 Eanáir 2022. Idir an dá linn, má tá tástálacha antaiginí ar fáil duit agus má tá siomptóim COVID-19 agat, is féidir leat tástálacha antaiginí a úsáid de réir mar a ordaítear mar mhalairt ar thástáil PCR. Mar is gnáth, má tá aon imní cliniciúil ort, tráth ar bith, déan teagmháil le do dhochtúir teaghlaigh."

Oibreoidh an Roinn Sláinte agus FSS le chéile anois chun na nuashonruithe seo a chur i bhfeidhm.

Ina theannta sin, agus mar gheall ar an méadú ar mhinicíocht, tá pleananna bainistíochta riosca agus teagmhasacha i bhfeidhm ag Ranna Rialtais chun leanúnachas oibríochtaí na n-earnálacha criticiúla a chinntiú. Tá monatóireacht ghéar á dhéanamh ar an scéal.

Féadfaidh Ard-Rúnaithe na Ranna ábhartha a breithiúnas féin a úsáid maidir le húsáid eisceachtúil maoluithe ó threoir dlúththeagmhálacha in imthosca sonraithe.

Ina theannta sin, d’iarr an Rialtas ar shláinte an phobail an treoir reatha (maidir leis na riachtanais gluaiseachta srianta do dhlúth-theagmhálacha, nach bhfuil aon siomptóim á dtaispeáint acu) a athbhreithniú chun an riosca do sheirbhísí riachtanacha agus don bhonneagar criticiúil a íoslaghdú.

Dúirt an tAire Donnelly: >“Tá minicíocht galair ag méadú go tapa in Éirinn, le cásanna laethúla le déanaí i bhfad níos mó ná an líon is airde a tuairiscíodh roimhe seo sa phaindéim. Meastar anois go bhfuil an mhinicíocht 14 lá os cionn 2,300 in aghaidh gach 100,000 den daonra. Táimid ag feiceáil leibhéil cásanna laethúla nua san ospidéal nach bhfaca muid ó mhí Eanáir seo caite. Tugann na sonraí is déanaí maidir le sonraí teip sprice S-géine le fios go bhfuil baint ag thart ar 92% de na cásanna leis an leagan Omicron.

“Cé go bhfuil ag éirí go han-mhaith lenár gclár teanndáileog, ciallaíonn an méid a bhfuil an eipidéim ag luasghéarú go bhfuil imní mhór ann fós maidir leis an tionchar dóchúil a bheidh ag líon ard cásanna den sórt sin ar ár seirbhísí sláinte.

“Cuimhnigh gach ceann de na bearta cosanta atá ar fáil dúinn a chur san áireamh lena n-áirítear masc a chaitheamh, aeráil mhaith, tástáil antaiginí agus cloí le treoir sláinte poiblí eile."

CRÍOCH

NÓTAÍ

Ba chóir ceisteanna a bhaineann le bainistíocht riosca agus pleananna teagmhais a sheoladh chuig Preas-Oifigí ábhartha na Roinne.

Eisíonn an tAire Donnelly nuashonruithe ar fhreagairt shláinte phoiblí na hÉireann ar phaindéim COVID-19

NÓTAÍ

Cuid den

Feachtais

Polasaí