Ó An Roinn Turasóireachta, Cultúir, Ealaíon, Gaeltachta, Spóirt agus Meán
Foilsithe
An t-eolas is déanaí
Tá réimse tacaíochtaí maoinithe fógartha ag an Aire Turasóireachta, Cultúir, Ealaíon, Gaeltachta, Spóirt agus Meán, Catherine Martin T.D., ar fiú tuairim is €900,000 ar fad iad, chun cuidiú le húdaráis áitiúla tionscnaimh chomórtha faoi stiúir an phobail a fhorbairt i gcuimhne ar na himeachtaí suntasacha a tharla i gCorcaigh agus ar fud na tíre in 1920.
Tá baint lárnach ag Corcaigh le clár comórtha na bliana seo, i gcuimhne na n-imeachtaí a tharla sa Chathair agus sa Chontae céad bliain ó shin, imeachtaí a d'athraigh cúrsaí ó bhonn. I measc na n-imeachtaí eile a bheidh á gcomóradh i mbliana beidh Frithcheilg Connaught Rangers, Creachadh Bhaile Brigín, Domhnach na Fola, agus cur chun báis Kevin Barry.
Dúirt an tAire Martin:
"Ba mhaith liom buíochas ó chroí a ghlacadh le húdaráis áitiúla na tíre, a bhfuil a gcláir féin do Dheich mBliana na gCuimhneachán na bliana seo curtha le chéile acu le díograis, samhlaíocht agus le cáiréis, d'ainneoin na mbrúnna suntasacha a gcaithfidh siad aghaidh a thabhairt orthu de bharr phaindéim COVID-19. Bhí Éirinn i mbun na Coimhlinte chun Neamhspleáchas a bhaint amach céad bliain ó shin agus tá ról lárnach glactha ag údaráis áitiúla na tíre maidir le tacaíocht a thabhairt don phlé náisiúnta faoin tréimhse dheacair seo sa stair.
Tá sé beartaithe agam leanúint den chur chuige seo idir an Rialtas, na Rialtais Áitiúla agus pobail áitiúla, a chuireann crann taca ar fáil chun a chinntiú go ndéantar na himeachtaí casta agus íogaire a thit amach le linn na Coimhlinte chun Neamhspleáchas a bhaint amach a chomóradh ar bhealach atá iontaofa, ómósach, meáite agus ionchuimsitheach. Aithnítear tríd an gcur chuige seo an gá atá ann a bheith tuisceanach maidir leis an gcomhthéacs staire áitiúil agus aithnítear chomh maith nach raibh aon dá thaithí ann a bhí mar an gcéanna sna contaetha ná ar oileán na hÉireann le linn na Coimhlinte chun Neamhspleáchas a bhaint amach ná le linn Chogadh na gCarad. Éascófar rannpháirtíocht ó gach pobal agus ó gach traidisiún trí cheannaireacht thuisceanach agus chéillí na n-údarás áitiúil.
Leanfar den chomhairle sláinte poiblí agus bearta cosanta i leith COVID-19 a úsáid chun eolas a dhéanamh do phleananna maidir leis na himeachtaí comórtha mar aon leis na gníomhaíochtaí for-rochtana atá bainteach leo agus beidh sin mar bhonn agus mar thaca acu."
Maidir le cláir chomórtha Chontae Chorcaí agus Chathair Chorcaí, dúirt an tAire Martin:
“Cuireadh imeachtaí comórtha poiblí i gContae agus i gCathair Chorcaí ar ceal nó ar athló le roinnt míonna anuas de bharr phaindéim COVID-19 agus rinneadh sin i gcomhréir leis na bearta sláinte poiblí chun an pobal a chosaint. Tá díomá mór ar gach duine a d'oibrigh go fíorchrua chun clár comórtha fiúntach agus suntasach a fhorbairt.
Tá forbairt arís déanta ag Comhairlí Cathrach agus Contae araon ar a gcuid pleananna chun na srianta a ghlacadh san áireamh agus tá cláir shamhlaíocha agus ina bhfuil ábhair machnaimh curtha le chéile acu i ndáil leis an gcuid eile den bhliain agus tá ríméad orm go bhfuil mo Roinnse ag cur go mór leis an dá Chlár. Táim cinnte go ndéanfar na himeachtaí a tharla i gCorcaigh in 1920 a chomóradh ar bhealach atá fiúntach, ómósach agus ionchuimsitheach.
Reáchtálfar comóradh Stáit cuí i mbliana, an 1 Samhain i gCathair Chorcaí - déanfar na pleananna don chomóradh sin a fhorbairt i gcomhréir leis an gcomhairle sláinte agus na bearta cosanta poiblí atá ag athrú an t-am ar fad.”