Preasráitis
Príomhoifigigh Leighis ag impí ar gach duine fanacht sa bhaile
Foilsithe
An t-eolas is déanaí
Foilsithe
An t-eolas is déanaí
Chuir Príomhoifigigh Leighis i dTuaisceart Éireann agus in Éirinn a n-imní in iúl faoi leibhéil arda Covid-19 agus tá siad ag impí ar gach duine fanacht sa bhaile.
Dúirt na Príomhoifigigh Leighis, an Dr Michael McBride agus an Dr Tony Holohan:
“Mar Phríomhoifigigh Leighis, tá imní mhór orainn faoin leibhéal ard neamh-inbhuanaithe d’ionfhabhtú COVID-19 ar oileán na hÉireann. Tá tionchar suntasach aige seo ar shláinte ár ndaonra agus ar fheidhmiú sábháilte ár gcóras cúram sláinte.
“Ar an drochuair, mar gheall ar ardú na n-ionfhabhtuithe le cúpla seachtain anuas, tá méadú tagtha ar fhigiúirí básmhaireachta agus tá ár gcórais sláinte curtha faoi bhrú ollmhór. Is dóigh go bhfeicfimid méaduithe leanúnacha i líon na ndaoine sna hospidéil agus sna haonaid dianchúraim agus i líon na mbásanna sna seachtainí amach romhainn."
Tá an dá phríomhoifigeach leighis ag impí go láidir ar gach duine fanacht sa bhaile ach amháin ar chúiseanna riachtanacha, agus gach turas gan ghá a sheachaint, lena n-áirítear taisteal trasteorann.
Dúirt siad:
“Tá go leor de na hothair a cuireadh san ospidéal i mí Eanáir faoi 65 bliana d’aois. Is féidir le COVID-19 dul i bhfeidhm orainn go léir, beag beann ar aois nó ar bhunghalar. Leagann sé béim ar an ngá atá ann do gach duine againn a chéile a chosaint trí fanacht sa bhaile. Ní amháin go gcoinneoidh tú féin agus do ghaolta slán, ach cabhróidh tú freisin le daoine a shábháil agus iontrálacha COVID-19 chuig ár gcóras cúram sláinte a sheachaint, córas atá ag streachailt faoi láthair."
“Leanfaimid orainn ag obair le chéile chun sláinte an phobail a chosaint ar fud an oileáin, mar a rinneamar ar fud na paindéime seo, ach caithfidh gach duine a chuid a dhéanamh trí fanacht sa bhaile agus iad féin agus an pobal a chosaint."
CRÍOCH