Ó An Roinn Forbartha Tuaithe agus Pobail
Foilsithe
An t-eolas is déanaí
D'fhógair an tUasal Michael Ring TD, an tAire Forbartha Tuaithe agus Pobail inniu go mbainfidh 156 baile agus sráidbhaile faoin tuath ar fud na tíre leas as maoiniú €15 milliún faoi Scéim Athnuachana na mBailte agus na Sráidbhailte 2019. D'fhógair an tAire Ring an maoiniú i gCoill an Bhealaigh, Co. Mhaigh Eo, ar Sráidbhaile é a gheobhaidh maoiniú faoi Scéim 2019.
Is príomhchuid den Phlean Gníomhaíochta um Fhorbairt Tuaithe agus de Chlár Thionscadal Éireann 2040 an Rialtais d'Athghiniúint na Tuaithe í Scéim Athnuachana na mBailte agus na Sráidbhailte. Is idir €20,000 agus €100,000 den chuid is mó atá an maoiniú atá á bhronnadh ar bhailte agus ar shráidbhailte i mbliana, agus gheobhaidh 26 togra idir €100,000 agus €200,000 do na tograí níos uaillmhianaí atá acu.
Áirítear ar na tograí atá ceadaithe feabhsúcháin sa réimse poiblí, úsáid eile á baint as foirgnimh sa phobal agus bearta eile atá dírithe ar bhailte agus ar shráidbhailte beaga faoi tuath a dhéanamh níos tarraingtí agus níos inmharthana le bheith ag obair agus ag maireachtáil iontu.
Ag fógairt an mhaoinithe inniu, dúirt an tAire Ring :
"Is cuid thábhachtach de threallús an Rialtais ár gcuid bailte agus sráidbhailte a fheabhsú agus iad a bheith ina n-áiteanna tarraingteacha le bheith ag obair iontu agus le bheith ag maireachtáil iontu í Scéim Athnuachana na mBailte agus na Sráidbhailte.
"Tá an leas a baineadh as an maoiniú roimhe seo faoi Scéim Athnuachana na mBailte agus na Sráidbhailte á bhraith anois ar fud na tíre agus tá ríméad orm go bhfuil mé ábalta €15 milliún eile a leithdháileadh inniu ar thograí in 156 baile agus sráidbhaile faoin tuath ar fud na hÉireann.
"Tá beagnach €68 milliún ceadaithe anois le haghaidh breis is 830 togra ar fud na tíre faoi Scéim Athnuachana na mBailte agus na Sráidbhailte ó tugadh isteach í sa dara leath den bhliain 2016, agus tá breis is 600 díobh sin ceadaithe ó seoladh an Plean Gníomhaíochta um Fhorbairt Tuaithe i mí Eanáir 2017.
Dúirt an tAire Ring freisin :
"Bhí spéis an-mhór i mbliana sa Scéim Athnuachana na mBailte agus na Sráidbhailte agus bhí ró-éileamh uirthi. Níorbh fhéidir na hiarratais ar fad a fuarthas a mhaoiniú, ach tá áthas orm go bhfuil go leor de na bailte agus de na sráidbhailte ar éirigh leo i mbliana ag fáil maoiniú faoi Scéim Athnuachana na mBailte agus na Sráidbhailte den chéad uair i mbliana. Ba mhaith liom mo bhuíochas a chur in iúl do na hÚdaráis Áitiúla as a bheith rannpháirteach le pobail áitiúla sna cásanna seo d'fhonn cuidiú leo tograí maithe a bhfuil tacaíocht tuillte acu a aithint.
Dúirt an tAire chomh maith :
"Léirítear tiomantas an Rialtais chomh maith tacaíocht a thabhairt do cheantair thuaithe in Éirinn a thuilleadh le Ciste um Athghiniúint agus Forbairt Tuaithe Thionscadal Éireann 2040 a chuireann le Scéim Athnuachana na mBailte agus na Sráidbhailte agus faoina gcuirtear deis ar fáil chun tograí níos comhtháite agus níos uaillmhianaí a sheachadadh a thabharfaidh tuilleadh tacaíochta d'athghiniúint ár gcuid bailte agus ár gcuid sráidbhailte faoin tuath.
Is féidir sonraí na dtograí ar éirigh leo faoi Scéim Athnuachana na mBailte agus na Sráidbhailte 2019 : anseo
Is togra faoin bPlean Gníomhaíochta um Fhorbairt Tuaithe agus faoi Chlár Thionscadal Éireann 2040 an Rialtais d'Athghiniúint na Tuaithe í Scéim Athnuachana na mBailte agus na Sráidbhailte. Is cuid de shraith beart tacaíochta náisiúnta agus áitiúil í chun bailte agus sráidbhailte faoin tuath ar fud na hÉireann a athnuachan. Tá an scéim á cistiú ag an Roinn Forbartha Tuaithe agus Pobail agus á riar trí na hÚdaráis Áitiúla.
Faoin scéim 2019 cuirfidh an Roinn suas le 80% de chostas iomlán gach togra a cheadaítear ar fáil agus cuirfidh an pobal agus/nó na hÚdaráis Áitiúla an 20% eile ar fáil.
Tá réimse leathan tograí ceadaithe faoi scéim 2019. Is iad na grúpaí pobail agus gnóthaí áitiúla i gcomhar le hÚdaráis Áitiúla a thug na tograí seo chun suntais. Áirítear ar na tograí atá ceadaithe feabhsúcháin sa réimse poiblí, úsáid eile á baint as foirgnimh sa phobal agus bearta eile atá dírithe ar bhailte agus ar shráidbhailte beaga faoin tuath a dhéanamh níos tarraingtí agus níos inmharthana le bheith ag obair agus ag maireachtáil iontu.
Seoladh Scéim Athnuachana na mBailte agus na Sráidbhailte sa dara leath de 2016 agus tá maoiniú €68 milliún ceadaithe do bhreis is 830 togra ó shin, na tograí a fógraíodh inniu san áireamh.
Ar cheann de spriocanna an Phlean Gníomhaíochta um Fhorbairt Tuaithe, a foilsíodh i mí Eanáir 2017, bhí tacaíocht a thabhairt do 600 baile agus sráidbhaile faoi Scéim Athnuachana na mBailte agus na Sráidbhailte. Tá an sprioc sin sáraithe agus tá breis is 660 togra ceadaithe ó mhí Eanáir 2017.
Is féidir lucht faighte an mhaoinithe seo faoi Scéim Athnuachana na mBailte agus na Sráidbhailte a fheiceáil ar an nasc thíos: Nasc le cur isteach