Preasráitis
Nuashonraí maidir le hÍocaíochtaí a Dámhadh d'Íocaíocht Dífhostaíochta Phaindéim COVID-19 agus Sochar Breoiteachta Feabhsaithe - an 15 Meitheamh
Foilsithe
An t-eolas is déanaí
An tseachtain seo, d’eisigh an Roinn Coimirce Sóisialaí íocaíochtaí seachtainiúla ar luach €78.9 milliún do 267,371 duine a fuair an Íocaíocht Dífhostaíochta Paindéime (PUP).
Is ionann é seo agus laghdú 17,894 duine i gcomparáid leis an tseachtain seo caite.
Go dtí seo, lena n-áirítear íocaíochtaí na seachtaine seo, tá os cionn €8 billiún PUP íoctha ag an roinn.
Tá na figiúirí a foilsíodh inniu sa bhreis ar an 171,699 duine a bhí ar an mBeochlár ag deireadh mhí Bealtaine.
Íocadh gach Íocaíocht Dífhostaíochta Phaindéim COVID-19 i gcuntais bhainc na bhfaighteoirí nó ag Oifig an Phoist inniu, Dé Máirt, an 15 Meitheamh.
Is é Baile Átha Cliath an contae leis an líon is mó daoine a bhfuil PUP á bhfáil acu an tseachtain seo ag 93,036. Ina dhiaidh sin tá Corcaigh (25,242) agus Gaillimh (14,683).
Is í an earnáil leis an líon is mó daoine a fhaigheann PUP an tseachtain seo ná gníomhaíochtaí Cóiríochta agus Seirbhíse Bia (77,380), agus Trádáil Mhórdhíola agus Mhiondíola (39,192) agus Gníomhaíochtaí Seirbhíse Riaracháin agus Tacaíochta (26,289) ina dhiaidh sin.
Is í an earnáil a chonaic an laghdú is mó i líon na ndaoine a fuair PUP an tseachtain seo ná gníomhaíochtaí na Cóiríochta agus na Seirbhíse Bia le 7,407 níos lú daoine ag fáil na híocaíochta i gcomparáid leis an tseachtain seo caite. Ina dhiaidh sin tá Trádáil Mhórdhíola agus Mhiondíola le 2,503 níos lú daoine ag fáil na híocaíochta i gcomparáid leis an tseachtain seo caite.
Ritheann an tseachtain íocaíochta don Íocaíocht Dífhostaíochta Phaindéime ón Aoine go dtí an Déardaoin agus íoctar íocaíochtaí an Máirt dar gcionn. Gheobhaidh daoine aonair a dhún a PUP Dé Luain an 14 Meitheamh, agus iad ar ais ag obair, a n-íocaíocht PUP deiridh Dé Máirt an 22 Meitheamh.
Fanfaidh PUP ar oscailt d’iontrálaithe nua suas go dtí an 30 Meitheamh 2021. Ón 1 Iúil 2021, dúnfar PUP d’iarratais nua agus ba cheart do dhaoine aonair a chailleann a bhfostaíocht ón 1 Iúil iarratas a dhéanamh ar íocaíocht cuardaitheora poist nó ar íocaíocht leasa eile.
Ag labhairt di inniu ar na figiúirí PUP is déanaí, dúirt an tAire Coimirce Sóisialaí Heather Humphreys:
“An tseachtain seo, chonaiceamar titim eile i líon na ndaoine a fhaigheann an Íocaíocht Dífhostaíochta Phaindéime agus muid ag leanúint ar aghaidh ag déanamh dul chun cinn maidir lenár ngeilleagar a athoscailt agus an víreas a chur faoi chois.
“Déanta na fírinne, tá breis agus 214,000 níos lú daoine á dtacú ag an PUP anois i gcomparáid leis an dara seachtain de mhí Feabhra.
“Le seacht lá anuas amháin, dhún beagnach 24,000 duine a n-éilimh PUP chun filleadh ar an obair.
“Dá bhrí sin, táimid ag súil le titim bhreise i líon foriomlán an PUP sna seachtainí amach romhainn.
Dúirt an tAire:
“Ba mhaith liom aitheantas a thabhairt do na hiarrachtaí ollmhóra atá á ndéanamh ag fostóirí agus iad ag athoscailt, go leor trína ngnó a athchumrú chun freastal ar a gcuid custaiméirí agus foirne agus a chinntiú go bhfuil sábháilteacht thar a bheith tábhachtach i gcónaí.
“D'iarrfainn ar dhaoine tacú lena ngeilleagar áitiúil, chomh maith le leithéidí ár n-óstán, Leaba agus Bricfeasta agus gnólachtaí eile inár n-earnáil fáilteachais.
“Ó lá go lá, táimid ag leanúint ar aghaidh ag déanamh dul chun cinn suntasach maidir lenár gclár vacsaínithe.
“Beimid san airdeall, leanfaimid ag obair ón mbaile nuair is féidir agus leanfaimid le treoirlínte um scaradh sóisialta a choinneáil.
“Mar gheall ar na hiarrachtaí atá á ndéanamh ag daoine, tá dóchas dáiríre againn maidir leis na míonna samhraidh atá amach romhainn."
Leanann an roinn ag meabhrú d’oibrithe atá ag filleadh ar an obair go gcaithfidh siad a n-éileamh ar an Íocaíocht Dífhostaíochta Phaindéime a dhúnadh ar an dáta iarbhír a dtosaíonn siad ar ais ag obair, d’fhonn a chinntiú go ndéantar a n-éileamh a phróiseáil i gceart agus chun ró-íocaíocht a sheachaint a dhéanfaidh an roinn iarracht a aisghabháil.
Toisc go n-íoctar PUP go seachtainiúil i riaráiste tá os cionn 17,875 de na daoine seo ag fáil íocaíochta deiridh an tseachtain seo agus tá siad fós san áireamh sna huimhreacha atá á n-íoc an tseachtain seo.
Is iad na hearnálacha leis an líon is mó fostaithe atá ag dúnamh a n-éileamh ar Íocaíocht Dífhostaíochta Phaindéime le filleadh ar an obair ná earnáil ghníomhaíochtaí na Seirbhíse Cóiríochta agus Bia (11,919), Trádáil Mhórdhíola agus Mhiondíola (2,255) agus Tógáil (1,943).
Is é an bealach is éasca le héileamh ar an Íocaíocht Dífhostaíochta Phaindéime a dhúnadh ná ar líne trí www.MyWelfare.ie. Is féidir le haon oibrí atá ag filleadh ar obair a bhfuil ceist aige maidir lena éileamh a dhúnadh, teagmháil a dhéanamh le Líne Chabhrach Tacaíochta Ioncaim tiomnaithe na Roinne 1890 800 024 idir 9am go 5pm Luan go hAoine.
Déanann an roinn sraith seiceálacha réamhíocaíochta agus iar-íocaíochta ar gach éileamh PUP lena n-áirítear seiceálacha incháilitheachta leanúnacha. Faoi réir na seiceálacha sin a ghlanadh, déanann an roinn íocaíochtaí a phróiseáil bunaithe ar fhéin-dhearbhú na gcliant.
Ritheann an roinn seiceálacha iar-íocaíochta lena n-áirítear sonraí a fhíorú i gcoinne taifid Ioncaim, scrúdú a dhéanamh ar chásanna ina n-úsáidtear an cuntas Bainc céanna arís agus arís eile, scrúdú a dhéanamh ar chásanna ina dtuairiscíonn fostóir nó baill den phobal imní, agus anailísíocht sonraí a úsáid chun éilimh a aithint agus a sheiceáil. Déanann sí cigireachtaí ar fhostóirí freisin.
Is é Aonad Speisialta Imscrúdaithe na roinne a dhéanann an obair seo, a chuimsíonn níos mó ná 20 Garda ar iasacht don roinn.
De réir mar a athosclaíonn an tionscal beidh cigirí na roinne ag déanamh athbhreithnithe rialaithe agus ag meaitseáil taifid i gcoinne sonraí párolla fostóirí ó na Coimisinéirí Ioncaim chun a chinntiú go ndúnfaidh daoine a n-éileamh agus iad ag filleadh ar obair. Chun ró-íocaíocht a sheachaint ba cheart do dhaoine atá ag filleadh ar obair a n-éileamh a dhúnadh agus is féidir leo é a dhéanamh go héasca ag www.MyWelfare.ie.
Is féidir le daoine féinfhostaithe a bhfuil an Íocaíocht Dífhostaíochta Phaindéime (PUP) á fáil acu agus atá ag iarraidh a ngnó a chothabháil suas le €960 a thuilleamh thar thréimhse ocht seachtaine, agus a dteidlíocht iomlán PUP a choinneáil.
Níl aon phróiseas iarratais foirmiúil ann agus ní gá do dhuine féinfhostaithe ach an roinn a chur ar an eolas má thuilleann siad os cionn €960 in aon tréimhse ocht seachtaine.
Fanfaidh an Deontas Tacaíochta Fiontair €1,000 i bhfeidhm don chuid eile den bhliain do dhaoine féinfhostaithe a dhúnann a n-íocaíocht PUP. Beidh siad siúd a d’éiligh an deontas in 2020 ach arbh éigean dóibh dul ar ais ar PUP in 2021, in ann rochtain a fháil ar an deontas den dara huair.
Is é an bealach is éasca agus is tapa le hiarratas a dhéanamh ar go leor íocaíochtaí leasa shóisialaigh, lena n-áirítear an Íocaíocht Dífhostaíochta Phaindéime, an Sochar Breoiteachta Feabhsaithe agus an Sochar Cuardaitheora Poist ná ar líne ag www.MyWelfare.ie. Is ardán é seo atá sábháilte, slán agus inrochtana ag am ar bith, áit ar bith agus ar gach gléas. Tá an rogha ag daoine iarratas a dhéanamh ar Shochar Máithreachais, Sochar Atharthachta, Sochar Leanaí, aisíocaíochtaí ÁSPC agus íocaíochtaí Cuardaitheora Poist chomh maith le ráiteas nó taifead ar ranníocaíochtaí árachais shóisialta a iarraidh ón roinn.
Tá an tseirbhís iarratais chun iarratas a dhéanamh ar Uimhir PSP ar fáil ag www.MyWelfare.ie do dhaoine atá ina gcónaí in Éirinn atá 18 mbliana d’aois ar a laghad agus a bhfuil Uimhir PSP de dhíth orthu chun leas a bhaint as sochair leasa shóisialaigh, seirbhísí poiblí agus faisnéis in Éirinn. Chun iarratas a dhéanamh ar Uimhir PSP ar líne, beidh gá le cuntas bunúsach MyGovID .
Ar mhaithe le comhairle sláinte poiblí agus cloí le scaradh sóisialta iarrtar ar dhaoine, más féidir, gan freastal ar a nIonad Intreo áitiúil. Ina áit sin, ba cheart dóibh leas a bhaint as na seirbhísí ar líne atá ar fáil trí www.MyWelfare.ie.
Inniu, tá thart ar 872 duine ag fáil íocaíocht Sochair Breoiteachta Feabhsaithe, i gcomparáid le 892 an tseachtain seo caite.
Moltar d’fhostaithe nó do dhaoine féinfhostaithe a ndearnadh diagnóis orthu leis an víreas nó a ndúirt a ndochtúir leo féin-aonrú iarratas a dhéanamh ar Shochar Breoiteachta Feabhsaithe. Murab ionann agus an Sochar Breoiteachta caighdeánach, íoctar an Sochar Breoiteachta Feabhsaithe ón gcéad lá den bhreoiteacht. Is é an bealach is tapa agus is éasca le hiarratas a dhéanamh ar Shochar Breoiteachta Feabhsaithe ná trí www.MyWelfare.ie.
Tá sonraí iomlána maidir le Sochar Breoiteachta Feabhsaithe lena n-áirítear miondealú earnála agus contae chomh maith le próifíl aoise in Aguisíní 9, 10 agus 11.
Meabhraítear do chustaiméirí agus do bhaill an phobail faoi ghlaonna teileafóin agus teachtaireachtaí téacs caimiléireachta a d’fhéadfadh siad a fháil ó dhaoine aonair a mhaíonn gur oifigeach de chuid na roinne iad. Taispeánann na glaonna agus na téacsanna seo raon uimhreacha, lena n-áirítear roinnt a bhféadfadh sé gur cosúil go bhfuil siad ó uimhreacha gutháin na roinne. Ba mhaith leis an roinn a custaiméirí go léir a mheabhrú nach lorgóidh sí faisnéis phearsanta ó chustaiméirí trí theachtaireacht téacs agus ní iarrfaidh sí ar chustaiméirí riamh a gcuid sonraí bainc ar an bhfón.
Iarrtar ar aon duine a fhaigheann glao nó téacs den sórt sin gan aon fhaisnéis a nochtadh agus é a thuairisciú don Gharda Síochána láithreach.
Preasoifig - Fiosrúcháin ó na Meáin (Lena n-áirítear Lasmuigh d’Uaireanta Oifige)
Seoladh:
An Roinn Coimirce Sóisialaí, Áras Mhic Dhiarmada, 1 Sráid an Stórais, Baile Átha Cliath 1, D01 WY03
Suíomh gréasáin:
Ríomhphost:
Uimhir theileafóin:
Léarscáil:
