Preasráitis
Fógraíonn an tAire Sláinte Poiblí, Folláine agus an Straitéis Náisiúnta Drugaí Ciste Feabhsaithe Seirbhísí Pobail €2 mhilliún do sheirbhísí drugaí agus alcóil
Foilsithe
An t-eolas is déanaí
Foilsithe
An t-eolas is déanaí
D’fhógair an tAire Stáit um Shláinte Phoiblí, Folláine agus na Straitéise Náisiúnta Drugaí, Frank Feighan TD, ciste €2 mhilliún inniu chun feabhas a chur ar sheirbhísí drugaí agus alcóil pobalbhunaithe. Tá an ciste mar chuid den tosaíocht straitéiseach chun feabhas a chur ar rochtain agus ar sheachadadh seirbhísí drugaí agus alcóil sa phobal sa straitéis náisiúnta drugaí 2021-2025. Cuireadh sonraí faoin gciste faoi bhráid an líonra tascfhórsaí drugaí agus alcóil inniu.
Dúirt an tAire Feighan:
“Tá lúcháir orm a fhógairt go bhfuil an Ciste Feabhsaithe Seirbhísí Pobail bunaithe chun maoiniú de €2m a chur ar fáil ar bhonn athfhillteach do sheirbhísí drugaí agus alcóil pobalbhunaithe. Tá idir €200,000 agus €240,000 in aghaidh na bliana á leithdháileadh agam ar na naoi n-eagraíocht chúram sláinte pobail (CHOanna), a choimisiúnóidh ansin seirbhísí pobalbhunaithe drugaí agus alcóil bunaithe ar mheasúnú ar riachtanais an daonra.”
Lean an tAire Feighan ar aghaidh:
“Beidh baint lárnach ag an líonra náisiúnta de 24 tascfhórsa drugaí agus alcóil sa chinneadh conas a chaithfear an maoiniú seo agus i gcoimisiúnú na seirbhísí. Tá tascfhórsaí bunaithe ar chomhpháirtíocht idirghníomhaireachta, rud atá ag croílár na Straitéise Náisiúnta Drugaí. Tá siad in ann measúnú a dhéanamh ar riachtanais daoine a úsáideann drugaí nó alcól agus chun tacú le hidirghabhálacha atá bunaithe ar fhianaise. Ba mhaith liom freisin daoine a bhfuil taithí acu ar úsáid drugaí a bheith páirteach i ndearadh agus i seachadadh na seirbhísí nua.''
Tá fiche cúig faoin gcéad de na leithdháiltí maoinithe ag gabháil chun rochtain agus soláthar seirbhísí drugaí agus alcóil a mhéadú do mhná, do mhionlaigh eitneacha agus don phobal LADTI+.
Dúirt an tAire Feighan:
‘‘Tá a fhios againn gur féidir bacainní a bheith roimh mhná, mionlaigh eitneacha agus an pobal LADTI+ maidir le rochtain a fháil ar sheirbhísí drugaí agus alcóil. Féadfaidh an úsáid a bhaineann siad as drugaí a bheith níos casta freisin de bharr fachtóirí inscne agus sóisialta.''
Tá an maoiniú nua ailínithe leis an mbéim ar chúram pobail feabhsaithe sa chlár athchóirithe Sláintecare, a aistríonn cúram isteach sa phobal agus níos gaire do thithe daoine.
Dúirt an tAire:
''Ba cheart go mbeadh seirbhísí drugaí agus alcóil mar chuid de chúram sláinte pobail. Trí sheirbhísí a chomhtháthú mar chuid de chúram príomhúil, is féidir an stiogma a bhaineann le húsáid drugaí agus alcóil a laghdú agus is féidir freastal ar riachtanais sláinte éagsúla na ndaoine a úsáideann drugaí. Is céim phraiticiúil é seo chun an fhreagairt ar úsáid drugaí agus alcóil a neartú ó thaobh na sláinte de.’’
Dúirt an tAire freisin go gcinnfidh riachtanais na ndaoine na cineálacha seirbhísí a bheidh ann:
“Tá riachtanais nua drugaí agus alcóil ag teacht chun cinn, cibé acu i ngeilleagar na hoíche, i measc daoine óga, i bpobail faoi mhíbhuntáiste nó in úsáid ildrugaí. Déanfar an maoiniú a leithdháileadh ar thimthriall trí bliana, le monatóireacht agus meastóireacht leanúnach, chun a chinntiú go bhfuil na seirbhísí éifeachtach chun aghaidh a thabhairt ar riachtanais na ndaoine a úsáideann drugaí agus alcól.”
Leithdháiltear an maoiniú ar bhonn daonra mar seo a leanas:
Táthar ag súil go gcuirfear an maoiniú do na seirbhísí nua ar fáil sa chéad ráithe de 2022.