Preasráitis
Buaileann McConalogue lena Mhacasamhail sa Ríocht Aontaithe maidir le Saincheisteanna Trádála
Ó An Roinn Talmhaíochta, Bia agus Mara
Foilsithe
An t-eolas is déanaí
Ó An Roinn Talmhaíochta, Bia agus Mara
Foilsithe
An t-eolas is déanaí
Bhuail an tAire Talmhaíochta, Bia agus Mara, Charlie McConalogue T.D, lena mhacasamhail sa Ríocht Aontaithe i Londain inné chun leas coiteann maidir le trádáil dhéthaobhach a phlé. Ceapadh an Ró-Onórach Steve Barclay, mar Rúnaí Stáit na Ríochta Aontaithe um Chomhshaol, Bia agus Gnóthaí Tuaithe i mí na Samhna 2023, agus tá a roinn freagrach as na rialuithe teorann a bhfuil feidhm acu maidir le hearraí agraibhia a allmhairítear chuig an mBreatain Mhór ón Aontas Eorpach.
Ag labhairt dó tar éis an chruinnithe, dúirt an tAire McConalogue:
“Bhí plé an-úsáideach agam leis an Státrúnaí Barclay inniu. Chuaigh mé i bhfeidhm air an leas frithpháirteach atá againn a chinntiú go bhfeidhmíonn trádáil in earraí agraibhia idir ár ndá thír chomh héifeachtach agus is féidir, d'ainneoin na socruithe riaracháin agus rialaithe níos casta a theastaíonn mar thoradh ar an mBreatimeacht. Sa chomhthéacs sin, agus i gcoinne chúlra thabhairt isteach rialuithe feabhsaithe na Ríochta Aontaithe i mbliana ar earraí talmhaíochta a thagann isteach agus a aistríonn an Bhreatain Mhór ón AE, d'aontaíomar go rachaidh ár n-oifigigh i dteagmháil go dlúth chun aon saincheisteanna teicniúla a d'fhéadfadh teacht chun cinn a réiteach agus aon fhrithchuimilt gan ghá d'onnmhaireoirí na hÉireann a sheachaint."
D'fháiltigh na hAirí freisin roimh athbhunú Thionól agus Fheidhmeannas Thuaisceart Éireann tuairim is dhá bhliain tar éis dóibh titim. Thug an tAire McConalogue aitheantas don chur chuige comhpháirtíochta an-éifeachtach as ar eascair athbhunú na n-institiúidí:
“Tá caidreamh déthaobhach na Ríochta Aontaithe-Éire an-tábhachtach don dá thír. Táimid inár gcomhchosantóirí ar Chomhaontú Aoine an Chéasta, gar-chomharsana a bhfuil ceangail phobail uathúla agus éagsúla acu; agus comhpháirtithe trádála a bhfuil naisc shuntasacha eacnamaíocha agus straitéiseacha acu. Bhí athbhunú institiúidí Thuaisceart Éireann ríthábhachtach, agus ar ndóigh soláthraíonn Creat Windsor bonn comhaontaithe a cheadaíonn do Thuaisceart Éireann, mar chuid de Mhargadh Inmheánach na Ríochta Aontaithe, an buntáiste uathúil a bhaineann le rochtain ar mhargadh aonair an AE de bheagnach 450 milliún duine. D'fhéadfadh sé seo a bheith ina ardán le haghaidh fáis agus forbartha i dTuaisceart Éireann amach anseo.”
Ghlac an tAire McConalogue páirt freisin i mBricfeasta Gnó de cheannairí gnó na Ríochta Aontaithe chun staid an chaidrimh Angla-Éireannaigh a phlé in 2024. Thapaigh an tAire an deis seo chun aird a tharraingt ar thiomantas dearfach Rialtas na hÉireann chun feabhas a chur ar an gcaidreamh leis an Ríocht Aontaithe amach anseo.
Mar fhocal scoir, dúirt an tAire McConalogue:
“Tá trádáil dhéthaobhach idir an Ríocht Aontaithe agus Éire fós ag fás sa dá threo agus b'fhiú thart ar €122 billiún í nó thart ar €2.4 billiún in aghaidh na seachtaine in 2023. Tá na ceangail eacnamaíocha fairsing, comhtháite agus comhthairbheach. Ní féidir linn dóigh a dhéanamh de na caidrimh eacnamaíocha seo, áfach, tá sé léirithe ag an mBreatimeacht nach mór dúinn leanúint ar aghaidh ag infheistiú sa chaidreamh déthaobhach leis an Ríocht Aontaithe chun na buntáistí don dá thír a uasmhéadú. Tá mé féin agus an Rialtas ar fad tiomanta go hiomlán dó seo agus thug mo chuairt ar Londain inné deiseanna chun béim a chur ar an tiomantas sin do réimse ceannairí gnó na Ríochta Aontaithe."
Trádáil Fhoriomlán na hÉireann-na Ríochta Aontaithe
• B'fhiú €122 billiún trádáil dhéthaobhach iomlán earraí agus seirbhísí idir Éire agus an Ríocht Aontaithe, le honnmhairí ó Éirinn go dtí an Ríocht Aontaithe de €66 billiún agus allmhairí ón Ríocht Aontaithe go hÉirinn de €57 billiún.
• Is ionann trádáil seirbhísí agus 58% de thrádáil na hÉireann leis an Ríocht Aontaithe. Onnmhairí seirbhísí ba ea 67% d'onnmhairí na hÉireann chuig an Ríocht Aontaithe agus onnmhairí earraí ba ea 33%.
• Ba í Éire an ceathrú margadh onnmhairiúcháin is mó sa Ríocht Aontaithe in 2022, chun tosaigh ar an tSín (gan HK agus Macao san áireamh) agus ar an bhFrainc. Ba iad SAM, an Ísiltír agus an Ghearmáin na trí thír ba mhó.
Trádáil Agraibhia na hÉireann-na Ríochta Aontaithe
• Rinneadh trádáil dhéthaobhach iomlán in earraí agraibhia idir an Ríocht Aontaithe agus Éire a luacháil ag €11.65 billiún in 2023 le honnmhairí Éireannacha go dtí an Ríocht Aontaithe ar fiú €6.88 billiún iad agus onnmhairí na Ríochta Aontaithe go hÉirinn ar fiú €4.77 billiún iad.
• Is í an Ríocht Aontaithe ceann scríbe Uimh. 1 d'onnmhairí Bia agus Dí na hÉireann arb ionann é agus 38% d'onnmhairí iomlána na hÉireann in 2023.
• Is í Éire an 3ú foinse is mó d'allmhairí Bia agus Dí na Ríochta Aontaithe.
• Is í Éire an ceann scríbe is mó d'onnmhairí Bia agus Dí na Ríochta Aontaithe.
DEIREADH