Fógraíonn an tAire McConalogue scéim nua – Deontas Comhairle Pleanála Comharbais
Ó An Roinn Talmhaíochta, Bia agus Mara
Foilsithe
An t-eolas is déanaí
Ó An Roinn Talmhaíochta, Bia agus Mara
Foilsithe
An t-eolas is déanaí
D'fhógair an tAire Talmhaíochta, Bia agus Mara, Charlie McConalogue T.D., go bhfuil scéim nua á sheoladh – Deontas Comhairle Pleanála Comharbais (SPAG).
Dúirt an tAire McConalogue: “Cé nach bhfuil sé uathúil d’Éirinn, aithním go bhfuil dúshláin mhóra dhéimeagrafacha san earnáil talmhaíochta agus mar sin tá an-áthas orm an tionscnamh tacaíochta nua seo a fhógairt faoi Phlean Straitéiseach CBT na hÉireann. Cabhróidh an Scéim seo le feirmeoirí níos aosta pleanáil a dhéanamh dá dtodhchaí agus do thodhchaí a bhfeirmeacha, trí thacaíocht airgeadais a sholáthar i dtreo na gcostas a bhaineann le comhairle dlí agus airgeadais le haghaidh pleanáil comharbais.
“Tá sé thar a bheith tábhachtach a bheith in ann cabhrú le feirmeoirí cinntí a d’fhéadfadh a bheith an-deacair ach an-tábhachtach a dhéanamh faoi thodhchaí a bhfiontair feirmeoireachta. Cuirfidh an scéim seo go mór leis an raon tacaíochtaí d'athnuachan glúine atá i bhfeidhm cheana féin, tacaíochtaí suntasacha agrachánach san áireamh; agus tacaíochtaí láidre d’fheirmeoirí óga agus d’fheirmeoireacht chomhoibríoch faoin bPlean Straitéiseach CBT.”
Is iad cuspóirí na Scéime Deontais Comhairle Pleanála Comharbais ná:
● Dea-chleachtas a spreagadh maidir le haistriú talún ó ghlúin go glúin chun aghaidh a thabhairt, i measc rudaí eile, ar mhíchothromaíochtaí suntasacha ó thaobh na glúine de laistigh den fheirmeoireacht.
● Feirmeoirí 60 bliain d'aois agus os a chionn a spreagadh agus tacú leo le comhairle pleanála comharbais a lorg trí suas le 50% de na costais dheimhnithe dlí, chuntasaíochta agus chomhairleacha a íoc, faoi réir uasíocaíochta de €1,500.
Tá seimineár eolais don scéim nua sceidealaithe don 6 Meán Fómhair 2023 ag 7pm.
Tá nasc clárúcháin don seimineár gréasáin ar fáil anseo , ar gach ardán meán sóisialta de chuid na Roinne Talmhaíochta, Bia agus Mara nó is féidir leat teagmháil a dhéanamh le do chomhairleoir áitiúil chun an nasc a fháil chun clárú.
Osclóidh an scéim ón 19 Meán Fómhair, beidh foirm iarratais pháipéir ar fáil ag an gComórtas Náisiúnta Treabhdóireachta agus ó shuíomh gréasáin na Roinne. Beidh an t-iarratas ar oscailt go dtí deireadh 2023 agus déanfar an chéad tráinse a íoc i Ráithe 1 de 2024.
Incháilitheacht agus Cé atá in ann an Deontas a fháil
Feirmeoirí 60 bliain d'aois agus os a chionn nach bhfuil faoi láthair i gcomhpháirtíocht feirme comharbais.
Ar a laghad 3 heicteár talún ag am an iarratais a shaothrú acu.
I mbun feirmeoireachta ar feadh 2 bhliain ar a laghad roimh iarratas.
CRÍOCH