Foilsithe
An t-eolas is déanaí
Chuir Frank Feighan TD, an tAire Stáit atá freagrach as Sláinte Poiblí, Folláine agus an Straitéis Náisiúnta Frithdhrugaí, fáilte roimh chomhaontú aireachta Chomhairle na Breataine-na hÉireann (BIC) comhoibriú ar thionscnaimh bheartais chun na díobhálacha a bhaineann le húsáid drugaí agus alcóil a laghdú. Tagann sé seo i ndiaidh cruinniú a raibh an tAire Feighan ina chathaoirleach air le hairí atá freagrach as saincheisteanna drugaí agus alcóil ó ocht mball riaracháin BIC, lena n-áirítear Tuaisceart Éireann, Albain, an Bhreatain Bheag, an Ríocht Aontaithe, Manainn, Geansaí agus Geirsí.
Dúirt an tAire Feighan:
"Is fóram tábhachtach é BIC d’airí chun freagairtí ar fhadhbúsáid drugaí agus alcóil a phlé agus comhoibriú leo. Bíonn tionchar ag drugaí agus alcól ar dhaoine aonair agus ar phobail ar fud na Breataine agus na hÉireann, lena n-áirítear drochshláinte, básanna anaibí, caidreamh teaghlaigh agus sóisialta a bhfuil damáiste déanta dóibh, agus foréigean agus imeaglú a bhaineann le drugaí. Tá na saincheisteanna seo dúshlánach do lucht riaracháin BIC dul i ngleic leo ina n-aonar. Trí oibriú le chéile, is féidir linn foghlaim a roinnt ar bheartais, seirbhísí agus idirghabhálacha atá bunaithe ar fhianaise chun díobhálacha drugaí agus alcóil a laghdú."
Chomhaontaigh airí BIC comhoibriú ar chúig thionscnamh beartas chun aghaidh a thabhairt ar dhíobhálacha drugaí agus úsáid alcóil sna trí bliana amach romhainn. Ina measc seo tá seachadadh seirbhísí drugaí agus alcóil le linn COVID-19, laghdú básanna a bhaineann le drugaí, meicníochtaí airgeadais chun díobhálacha a bhaineann le halcól a laghdú, agus cuir chuige comhcheangailte chun freastal ar riachtanais sláinte agus shóisialta daoine atá gan dídean agus a bhfuil andúil i ndrugaí acu. Chomhaontaigh na hAirí freisin ról na hearnála deonaí agus pobail a mheas i mbeartais drugaí agus alcóil agus i soláthar seirbhíse.
Dúirt an tAire Feighan:
"Is tréimhse an-dúshlánach é seo do dhaoine le fadhbúsáid drugaí agus alcóil mar gheall ar COVID-19. Dhaingnigh sé an gá atá le húsáid drugaí agus alcóil a chóireáil mar shaincheist sláinte poiblí. Chonaiceamar nuálaíochtaí tábhachtacha i soláthar seirbhísí drugaí agus alcóil ar fud na Breataine agus na hÉireann le bliain anuas. Cabhróidh struchtúr BIC linn na nuálaíochtaí seo a mheas agus an méid a fhoghlaimítear a chomhdhlúthú le haghaidh beartais.
"Fáiltím go háirithe roimh rannpháirtíocht BIC leis an earnáil dheonach agus phobail. Tá ról ríthábhachtach ag an earnáil seo maidir le seirbhísí drugaí agus alcóil a sholáthar i bpobail ar fud na hÉireann agus na Breataine, ag obair go minic le grúpaí an-leochaileacha. Trí oibriú leis an earnáil seo, is féidir linn guth úsáideoirí seirbhíse a neartú maidir le dearadh agus seachadadh seirbhísí drugaí agus alcóil."
Bunaíodh Comhairle na Breataine-na hÉireann (BIC) faoin gComhaontú ar thángthas air i gCaibidlí Ilpháirtí i mBéal Feirste ar Aoine an Chéasta 1998. Is fóram é dá ocht mBall Riaracháin chun faisnéis a mhalartú, plé a dhéanamh, dul i gcomhairle, agus na hiarrachtaí is fearr a úsáid chun teacht ar chomhaontú maidir le comhoibriú ar réimsí beartas a bhfuil leas frithpháirteach acu.
Déanann Rialtas na hÉireann cathaoirleacht ar earnáil oibre drugaí agus alcóil BIC agus tagann sé le chéile suas le trí huaire sa bhliain ar leibhéal oifigiúil agus gach dhá bhliain ar leibhéal aireachta.
Tá an Communiqué ó chruinniú aireachta BIC arna óstáil ag Rialtas na hÉireann go fíorúil an 11 Márta, 2021, ar fáil anseo.