Preasráitis
Óstálann an tAire McConalogue Idirphlé ar Mhná sa Talmhaíocht
Ó An Roinn Talmhaíochta, Bia agus Mara
Foilsithe
An t-eolas is déanaí
Ó An Roinn Talmhaíochta, Bia agus Mara
Foilsithe
An t-eolas is déanaí
Inniu óstálfaidh an tAire Talmhaíochta, Bia agus Mara, Charlie McConalogue TD, an tIdirphlé Náisiúnta ar Mhná sa Talmhaíocht i bPort Laoise. Tá an t-iar-Tánaiste agus Aire Talmhaíochta Mary Coughlan i gceannas ar an idirphlé agus beidh plé painéil agus ceardlanna ann, chomh maith le cainteoirí lena n-áirítear Iar-Aire Talmhaíochta na Gearmáine, Julia Klöckner, Príomhoifigeach Feidhmiúcháin Glanbia plc, Siobhán Talbot, An tAire McConalogue chomh maith lena chomhghleacaithe na hAirí Stáit Pippa Hackett agus Martin Heydon. Is é cuspóir an idirphlé ná tuairimí a bhailiú chun cur le beartas náisiúnta amach anseo ar cheist an chomhionannais inscne níos fearr sa talmhaíocht.
Dúirt an tAire McConalogue, agus é ag labhairt leis an idirphlé,
“As na 280,000 duine nach mór a oibríonn ar fheirmeacha in Éirinn, is mná iad 27% (75,113) díobh. Mar sin féin, as níos mó ná 130,000 sealbhóir feirme, ní mná iad ach 13% (16,900) díobh. Tá plean comharbais i bhfeidhm ag níos lú ná leath de na sealbhóirí feirme agus is fir iad 83% de na comharbaí aitheanta.
“Tá roinnt beart curtha san áireamh againn i bPlean Straitéiseach nua CAP na hÉireann a thacóidh le comhionannas inscne níos fearr. Chun ár spriocanna i bhFís don Bhia 2030 maidir le hinbhuanaitheacht chomhshaoil, eacnamaíoch agus shóisialta níos fearr a bhaint amach áfach, tá rannpháirtíocht ban níos mó ríthábhachtach. Ní féidir linn aghaidh a thabhairt ar na dúshláin agus na deiseanna atá amach romhainn a thapú má leanann tearcionadaíocht na mban, laistigh den fheirmeoireacht agus ar fud na hearnála.
“Tá sé in am ról na bhfeirmeoirí ban a thabhairt chun solais agus aird a tharraingt orthu. Creidim go ndéanfaidh Idirhphlé Náisiúnta na mBan é sin.”
Dúirt an tAire Stáit Hackett,
“Táim paiseanta faoi réitigh chomhoibríocha a aimsiú chun an clár oibre um chomhionannas inscne a chur chun cinn san earnáil talmhaíochta in Éirinn. Inniu, tá céim thábhachtach glactha againn maidir le teacht le chéile agus na saincheisteanna a phlé. Caithfimid leanúint ar aghaidh ag déanamh dul chun cinn anois ionas gur féidir le hagraibhia leas a bhaint as rannpháirtíocht ban níos mó sa todhchaí agus is féidir linn leanúint ar aghaidh lenár dturas i dtreo inbhuanaitheachta níos fearr a chur chun cinn, lena n-áirítear roghanna le haghaidh éagsúlú feirme a mheas, amhail orgánach agus foraoiseacht.”
Dúirt an tAire Stáit Heydon,
“Tá sé oiriúnach go bhfuilimid bailithe le chéile ar Lá Fhéile Bríde chun rannpháirtíocht agus infheictheacht na mban sa talmhaíocht a phlé. Is tosaíocht faoi Fhís don Bhia 2030 é inbhuanaitheacht shóisialta na talmhaíochta a fheabhsú agus tá comhionannas inscne ina chuid thábhachtach de sin. Ó thaobh na sábháilteachta feirme de, cuirfidh sé seo feabhas freisin le sláinte, folláine, agus sábháilteacht gach duine a chónaíonn agus a oibríonn ar fheirmeacha toisc go bhféadfadh tionchar níos mó a bheith ag mná i mbainistiú feirme maidir le cleachtais feirme níos sábháilte a ghlacadh.”
Cuirfear toradh idirphlé an lae inniu i dtuarascáil a bheidh mar bhonn eolais do bheartas ina leith seo sna blianta amach romhainn. Neartófar é seo trí thionscadal taighde sonrach ar rannpháirtíocht na mban sa talmhaíocht, agus trí rannpháirtíocht leanúnach le páirtithe leasmhara.