Preasráitis
Seolann an tAire Hackett staidéar COFORD ar dheimhniú deonach foraoise príobháidí
Ó An Roinn Talmhaíochta, Bia agus Mara
Foilsithe
An t-eolas is déanaí
Ó An Roinn Talmhaíochta, Bia agus Mara
Foilsithe
An t-eolas is déanaí
Fuair an tAire Stáit sa Roinn Talmhaíochta, Bia agus Mara, Pippa Hackett, staidéar inniu ó COFORD ar dheimhniú deonach foraoise príobháidí in Éirinn. Is próiseas deonach é deimhniú foraoiseachta d'úinéirí foraoisí trína ndeimhnítear foraoisí go neamhspleách de réir tacar sainithe méadrachta. Léiríonn an staidéar go bhfuil níos lú ná 6% d'fhoraoisí príobháideacha na hÉireann deimhnithe agus cuireann sé sraith moltaí ar fáil chun cabhrú le deimhniúchán a mhéadú.
Ag fáiltiú roimh an bhfoilseachán, dúirt an tAire:
“Léiríonn an staidéar seo ar dheimhniú deonach go soiléir an tábhacht a bhaineann leis an limistéar foraoise deimhnithe in Éirinn a mhéadú. Cé go bhfuil foraoisí stáit deimhnithe ó 2001 i leith tá méid an deimhnithe san earnáil phríobháideach fós ró-íseal agus is féidir leis a bheith ina bhac ar rochtain ar an margadh do na húinéirí sin. Tugann an staidéar seo achoimre ar roinnt moltaí agus molann sé sraith de na chéad chéimeanna eile atá tábhachtach anois do na páirtithe leasmhara go léir chun scrúdú a dhéanamh orthu. Beidh mo Roinn ag déanamh staidéir ar an tuarascáil freisin. Tá gá le beart chun an limistéar foraoise deimhnithe san earnáil phríobháideach a mhéadú, rud a éilíonn gníomhaíocht chomhchoiteann thar raon páirtithe leasmhara.”
Is iad an dá phríomhchomhlacht deimhniúcháin atá ag feidhmiú faoi láthair in Éirinn ná an Chomhairle Maoirseachta Foraoiseachta (FSC) agus an Clár um Fhormhuiniú Deimhnithe Foraoise (PEFC).
Dúirt an tAire chomh maith:
“Chuir mo Roinn maoiniú ar fáil do roinnt treoirstaidéar deimhniúcháin san am atá thart agus thug siad seo léargas luachmhar ar phraiticiúlacht an deimhnithe, chomh maith le teimpléid a sholáthar chun cuidiú le húinéirí príobháideacha atá ag smaoineamh ar a ngabháltais foraoise a dheimhniú. Mar sin féin, is léir go bhfuil gá ann go ndéanfaidh na páirtithe leasmhara go léir níos mó chun an leibhéal deimhnithe a theastaíonn le haghaidh rochtain iomlán ar an margadh a mhéadú. Táim ag tnúth le scrúdú a dhéanamh ar na chéad chéimeanna eile chun dul i ngleic leis na moltaí.”
Dúirt an Dr Eugene Hendrick, Cathaoirleach Chomhairle COFORD:
“Ba mhaith liom aitheantas a thabhairt d'obair dheonach thiomanta Ghrúpa Oibre Slógadh agus Réamhaisnéise Adhmaid COFORD faoina chathaoirleach, Patrick Murray as an tuarascáil seo ar dheimhniú foraoise a thabhairt chun cinn, chomh maith le húdair na tuarascála, chun an staidéar a thabhairt chun críche.
Tá an tuarascáil agus a moltaí an-tráthúil mar go meastar go saróidh leibhéil saothraithe foraoiseachta san earnáil phríobháideach leibhéal Choillte sna cúig bliana atá amach romhainn. In éagmais phróiseas deimhnithe atá ar fáil go héasca, agus beagnach dhá mhilliún go leith méadar ciúbach le teacht ó fhoraoisí príobháideacha, is dócha go mbeidh a n-úinéirí ag streachailt le rochtain ar an margadh. Ba cheart go scrúdódh na páirtithe leasmhara go léir agus an tAire na moltaí a tugadh ar aghaidh sa staidéar mar bhealach chun tosaigh chun deimhniú foraoise deonach a éascú.
Is comhlacht í an Chomhairle COFORD atá ceaptha ag an Aire Stáit Talmhaíochta, Bia agus Mara chun comhairle a chur ar an Aire agus ar an Roinn maidir le saincheisteanna a bhaineannn le forbairt na hearnála foraoiseachta in Éirinn. Is é an tAire Stáit a cheapann an bhallraíocht agus cuimsítear ann go leor páirtithe leasmhara ar fud na hearnála a bhfuil suim acu san fhoraoiseacht.
Tá foilseachán COFORD, “Staidéar ar Dheimhniú Foraoise Príobháidí in Éirinn”, ar fáil le híoslódáil ó láithreán gréasáin COFORD the COFORD website.
Scrúdaíonn an staidéar méid an deimhnithe deonacha foraoise in Éirinn agus ar fud na hEorpa agus cuireann sé sraith moltaí ar fáil chun leibhéil glactha i measc úinéirí foraoise príobháideacha a éascú.
Mhaoinigh an Roinn an staidéar agus ba iad Forestry Services Ltd, Western Forestry Co-op, Euroforest Ltd agus an comhairleoir foraoiseachta Henry Phillips a rinne an staidéar.