Preasráitis
Soláthar poiblí ag lorg aiseolais le haghaidh Staidéar Féidearthachta Olla fógartha ag an Aire Pippa Hackett
Ó An Roinn Talmhaíochta, Bia agus Mara
Foilsithe
An t-eolas is déanaí
Ó An Roinn Talmhaíochta, Bia agus Mara
Foilsithe
An t-eolas is déanaí
Inniu d’fhógair an tAire Pippa Hackett go bhfuil sí ag lorg soláthraí le taithí chun tabhairt faoi staidéar ar mhargaí ionchasacha do tháirgí olla.
Bhí an méid seo a leanas le rá ag an Aire Stáit sa Roinn Talmhaíochta, Bia agus Mara, le linn di soláthar poiblí iomaíoch a sheoladh chun athbhreithniú a dhéanamh ar éileamh ionchasach ar mhargaí baile agus idirnáisiúnta le haghaidh táirgí olla cosúil le hinsliú agus leasacháin:
‘Mar fheirmeoir caorach mé féin, tuigim go rímhaith an méid olla atá ar fáil i ndiaidh caorach a bhearradh le cúpla mí anuas, agus tuigim nach bhfuil an olann seo á díol ar phraghas maith. Ní mór dúinn an scéal seo a athrú agus bealaí nua a aimsiú chun an olann a úsáid agus margaí nua a aimsiú. Is chuige sin atá soláthraí le taithí á lorg agam chun an staidéar féidearthachta seo a chur i gcrích. Tá mé ag iarraidh go ndéanfar anailís ar an éileamh ionchasach a d’fhéadfadh a bheith ag margaí baile agus idirnáisiúnta ar tháirgí olla agus na haighneachtaí a fuarthas mar chuid den Staidéar Rannpháirtíocht Páirtithe Leasmhara a rinneadh le déanaí a chur san áireamh, agus tá súil agam go mbeidh an obair seo curtha i gcrích i mí na Samhna.’
Bhí an méid seo a leanas le rá ag an Aire chomh maith:
‘Tá neart olla le fáil sa tír seo. Tá olann inbhuanaithe agus in-athnuaite, agus tá ciall leis an bpoitéinseal a bhaineann leis an táirge seo a scrúdú. Tá úsáid á baint as olann san earnáil teicstílí ar ndóigh, ach chomh maith leis sin is ábhar orgánach, ísealcharbóin, nádúrtha é olann a d’fhéadfaí a úsáid b’fhéidir ar bhealach inmharthana i raon táirgí éagsúla cosúil le leasacháin, insliú agus pacáistiú. Táim ag súil go gcabhróidh an staidéar féidearthachta liom, nuair a bheidh sé curtha i dtoll a chéile, treochlár a fhorbairt do Thionscal Olla na hÉireann. Agus trí chúnamh agus treoir a fháil ó Ghrúpa Páirtithe Leasmhara an Fhóraim Olla atá á bhunú agam, táim ag súil go gcabhrófar liom bearta olla na todhchaí a fhorbairt mar a shamhlaítear iad i gClár an Rialtais.”
De réir na dtreoirlínte soláthair phoiblí, tá an t-athbhreithniú féidearthachta olla seo fógartha ar e-tenders. Postáladh an tairiscint ar shuíomh gréasáin eTenders ar an 08/07/2021, (http://www.etenders.gov.ie/) (RFT No 194051 ‘Review of the potential demand in domestic and international markets for wool based products’).
Is é an spriocdháta chun tairiscintí a fháil 5pm ar an 09/08/2021 agus samhlaítear go mbeidh an tairiscint seo foilsithe, go mbeidh na conarthaí sínithe agus go mbeidh tús curtha leis an athbhreithniú i Ráithe 4 de 2021.