Preasráitis
Athbhreithníonn an TánaisteTrúpaí na hÉireann ag dul i mbun seirbhíse le Dún Chostúim UNDOF
Foilsithe
An t-eolas is déanaí
Foilsithe
An t-eolas is déanaí
Athbhreithníonn an Tánaiste, an tAire Cosanta agus an tAire Gnóthaí Eachtracha, Micheál Martin, TD
Trúpaí na hÉireann ag dul i mbun seirbhíse le
Dún Chostúim UNDOF, Baile Átha Luain
Dé hAoine, 15ú Meán Fómhair 2023
D’athbhreithnigh an Tánaiste agus Aire Cosanta agus Gnóthaí Eachtracha, Micheál Martin TD, inniu (15 Meán Fómhair) na baill den 68ú Grúpa Coisithe a fhágfaidh sna seachtainí amach romhainn le haghaidh an rothlú trúpaí Éireannach ar scála mór deiridh le haghaidh seirbhíse le Fórsa Breathnóireachta Díscoir na Náisiún Aontaithe
Ag labhairt dó le linn an athbhreithnithe, dúirt an Tánaiste, “Is dáta tábhachtach san fhéilire míleata é aon Athbhreithniú Aireachta ar thrúpaí a théann thar sáile, ach tá suntas ar leith, agus rud beag suaithinseach, ag baint leis an athbhreithniú seo, ós rud é gurb é an rothlú trúpaí Éireannach ar mhórscála deiridh le haghaidh seirbhíse le Fórsa Breathnóireachta Díscoir na Náisiún Aontaithe, i láthair na huaire ar a laghad”.
Tá ionadaíocht ag saighdiúirí as 28 contae ar fud na hÉireann i measc an 130 meithle láidir a imscartar chuig UNDOF. Tá níos mó ná an ceathrú cuid den ghrúpa ar tí imscaradh ar a gcéad turas dualgais thar lear.
Ag labhairt leis an 68ú Grúpa Coisithe, dúirt an Tánaiste, “Le 65 bliain anois, tá Éire tar éis glacadh leis na hoibleagáidí a eascraíonn as a bheith mar chuid den phobal domhanda agus tá na mílte ban agus fear Éireannach tar éis an clogad gorm a chaitheamh agus iad bródúil as oibríochtaí síochánaíochta na NA. ”.
Lean an Tánaiste ar aghaidh le rá “Éilíonn dúshláin na síochánaíochta go leanann daoine cosúil leatsa – coimeádaithe na síochána ardoilte, disciplínithe agus tiomanta – ag feidhmiú ar an gcaighdeán is airde, in ainneoin cúinsí deacra go minic. Thar ceann mhuintir na hÉireann, gabhaim buíochas le gach duine agaibh as an bpáirt atá á imirt agaibh i leanúint le traidisiún bródúil na nglún de shíocháin na hÉireann.
Ina chuid cainte deiridh rinne an Tánaiste comhghairdeas le baill an 68ú Grúpa Coisithe faoi cheannas an Leifteanantchoirnéal Oliver Clear as a bhfuil bainte amach acu go dtí seo agus ghuigh sé misean sábháilte agus rathúil orthu.
CRÍOCH
Nóta don Eagarthóir
Ar iarratas ó na Náisiúin Aontaithe, tar éis cead a fháil ón Rialtas agus ó Dháil Éireann, rinneadh meitheal de na Buan-Óglaigh a imscaradh mar Chúltaca Soghluaiste na bhFórsaí chuig UNDOF ar Arda Golan ó 2013 i leith.
San am sin, rinneadh 2,690 turas aonair dualgais chuig misean UNDOF go dtí seo. Gabhann an figiúr seo pearsanra Óglaigh na hÉireann a imscaradh mar chuid de Ghrúpa Coisithe na hÉireann agus le Ceanncheathrú UNDOF.
Tar éis measúnú ar thiomantais reatha Óglaigh na hÉireann a thabhairt chun críche, socraíodh 133 pearsanra de chuid an Ghrúpa Coisithe a tharraingt siar ó UNDOF le héifeacht ó Aibreán 2024.
Ligfidh an cinneadh an Grúpa Coisithe a tharraingt siar ó UNDOF an t-earrach seo chugainn d’Óglaigh na hÉireann tabhairt faoi phróiseas comhdhlúthaithe maidir lena ngealltanais thar lear agus le hullmhú do mhisin síochánaíochta amach anseo chomh maith lena chinntiú go mbeidh an cumas ag Óglaigh na hÉireann a dtiomantas do Chathghrúpa 2024/2025 an AE a chomhlíonadh.
Imscarfar meitheal na hÉireann den 68ú Grúpa Coisithe ina bhfuil 133 pearsanra go Campa Faouar ar thaobh na Siria den limistéar idirscartha agus tiocfaidh siad in ionad pearsanra an 67ú Grúpa Coisithe.